Kapal Pesiar ”Charles – King”

        Risedek Komang Jayadi ngaturang bakti ring Hyang Gurune, saget teka timpalnyane ajaka dadua, I Gede Gotawa miwah Kadek Adiguna. Ditu timpalne kejagjagin olih bapannyane, laut ngeraos ”Ne, cening ajak dadua timpalne Komang, lautang dini negak malu diampike, antosang I Komang ia nu muspa”. Kesautin olih I Gede Gotawa ”Saja bapa, tiang timpalne I Komang Jayadi, rahinane ane jani mejanji lakar luas ke kota Denpasar, lakar tes ngalih gegaen di kapal pesiar”. 

            Disubane I Komang Jayadi suud muspa, ditu laut ia nyagjagin timpalnyane, tur laut ia morahang teken reramanne lakar luas ngemiluin tes ke kota Denpasar. ”Meme  sareng bapa, ane jani tiang lakar luas, sarengang astitiang ring Ida Sanghyang Widhi, mangda pejalan tiange nemu kerahayuan” keto raosne I Komang Jayadi. ”Nah, adeng-adeng cening ngaba montor, eda pati ngebut, apang selamet di jalan tur apa ane aptiang cening apang kesidan”, keto saut bapane.

            Disubane siaga teken bebekelan miwah alat-alat tulisne, laut I Komang Jayadi ajaka timpalne mejalan nuju kota Denpasar. Ia ajak timpalne lakar ngamiluin tes tulis miwah tes wawancara di kampusne, apang ngidaan megae di kapal pesiar. Komang Jayadi mula anak seleg melajah tur megae nulungin reramannyane, ento mekada reramane bani ngetohin ia masuk, yadiastun ipun mapiutangan ring pisagane.

            Uling nu masekolah di SMA, Komang Jayadi suba macita-cita apang buin pidan ngidayang megae di kapal pesiar. Ento makerana ia seleg melajahin basa inggris miwah basa dura negarane ane lenan. Di SMA ia nyemak jurusan bahasa, apanga ia ngelah bekel anggona ngisinin cita-citane, apang lancar mebasa inggris. Ia dot megae di kapal pesiar, sawireh ia nepukin keberhasilan beli misane ane megae di kapal pesiar. Beli misanne suba ngidaang nulungin reramane, meli tanah, ngae umah ane luung, tur suba ngelah montor roda empat.

            Di tamatne ia uling SMA ia ngelanjutan masuk ke Perguruan Tinggi Pariwisata, ngalih jurusan kapal pesiar. Ia kuliah makelone ataun. Dinane ane jani ajak timpalne lakar ngemiluin tes tulis miwah wawancara di kampusne. Kocap kampusne tongos ia kuliah ngadaang kerjasama ajak pemilik kapal pesiar luar negerine.

            Sawetara suba jam 8.30 WITA, ia ajak timpalne suba teked di kampusne. Komang Jayadi ngajakin timpalne ke kantin malu, lakar meli kopi, sawireh lima batisne miwah awakne kedinginan, bes joh pejalane uling desa Pucaksari di beten bukit kutule ngalih kota Denpasar, tempuhe ngantos dua jam. Disamping ento tesne masi ngawitin jam 9.00 WITA, maan galah buin abedik meblanja ke kantin kampusne.

            Di subane jam 9.00 WITA makejang pelamare ke kumpulang tur tundena masuk ke lantai dua, tongos tes tulis miwah wawancara. Sawetara ada telung jam mekelone ia metes tulis miwah wawancara. Dugase ia tes wawancara, pesu ketug tangkahne, sawireh ane ngetes langsung manajer personalia kapal pesiare. Ditu ia nunas ica ring para leluhurne mangda ilang ketugne, apanga tenang ngeraos mebasa inggris teken manajer personaliane ento. ”What is your name ?” keto petakon Mr. Robert, sautine teken Komang Jayadi ” My name is Komang Jayadi” . ” What is your motivation to work at Beunty Cruise?” , sautine teken ia ” I Want to get eksperience and aplication my skill”. Aketo tes wawancarane ane ingetange, ane lenan nu liu, sakewala ia lancar nyawab ngadokang basa inggris.  

            Komang Jayadi nawang ada tes tulis miwah wawancara, ngalih calon karyawan di kapal pesiar, sawireh ada dosene ane ngemahang kabar ia lewat telpon, kerana ia pedaleme tekening dosene, tawanga ia tuara ngelah, sakewala ia ngelah cita-cita ane melah, lakar ngalih gegaen ane liu gegodannyane, apang ngidayang nulungin reraman ipune, sane suba nyansan tua yusane tur pepesan ketiben gering. Sawetara ada ajaka selae diri ane ngemiluin tese ene, kone ngalih karyawan wantah adiri. Kocap ia ajaka timpalne makejang ane ngemiluin tes tusing baanga mulih malu, sawireh lakar kaumuman nyen ane lolos, keto raos ketua panitia penerimaanne. Sawetara jam 13.00 WITA, ditu makejang pemilet tes tundena makumpul teken panitiane. Lantas panitiane ngumumang nyen ane lulus seleksi calon pegawe kapal pesiar ”Charles – King” ane rutene Asia – Eropa.  Tan dumade, ketua panitiane nyambatang adane I Komang Jayadi ane lulus seleksi calon pegawe kapal pesiare ane suba kaloktah gede miwah melahnyane. Ditu ia kegirangan tur sahasa ngojog ketua panitiane, nakonang indik kelengkapan administrasi miwah buin pidan lakar nyumunin megae.

            ”Bapa miwah meme, tiang suba lulus seleksi calon pegawe kapal pesiar ”Charles-King”, sakewala tiang nu ngurus administrasi miwah paspor. Jani bapa beratin tiang, lakar munduhang pipis liune duang dasa yuta rupiah, anggon ngae paspor, ngurus surat-surat miwah bekel”, keto raosne Komang Jayadi. Lantas sautina teken bapane, ”Cening, Komang, bapa tusing ngidaang mekeneh buka jani, sawireh, pipis ane tagih cening duang dasa yuta rupiah totonan asane keweh baan bapa ngalihang, yen kekene terak keadaan iragane. Buin I Komang ngwales raos bapane, kekene ”Jani montor ane gelahang tiang lakar adep, lenan teken ento, ada ento sertifikat tegale, ento gadeang malu di bang, aliang pipis”. Buin timbalina teken bapane, ”Nah, yen aketo paitungan ceninge, bapa kene belog, nuutang papineh ceninge dogen”.

            Di subane montor suprane keadep, miwah sertifikat tanah tegalne kegadeang di bang, ngelah I Komang Jayadi pipis pitulas yuta rupiah, nu masi kuangan pipise buin telung yuta rupiah. Ditu ia buin mapineh-pineh, engken carane ngalih pipis buin telung yuta rupiah. Makleteg ia inget teken Luh Ayu tunanganne ane megae ditu di kota Denpasar, dadi tukang jait di perusahaan garmen. Semengan buin manine I Komang Jayadi nyilih montor teken timpalne, lakar anggona lakar anggona luas ke Denpasar nengokin tunanganne sambilanga nyilih pipis. Disubane metari teken meme bapane ditu laut ia ngenggalang ngidupang montore luas ke Denpasar. Bayune sada runtag miwah kangen, sawireh makelo tusing katemu ajak Luh Ayu. Sawetara liwat duang jam, teked ia di tongos tunangane megae, laut ia metari teken majikanne apanga presida katemu tekenin Luh Ayu. Di subane ajaka dadua saling katemu ditu laut I Komang Jayadi ngeraaos, kekene ”, Luh, ampurayang beli mara nyidayang nengokin, sawireh beli nu ngurus gegaen lakar anggon masa depan iragane, ajak dadua”. ”Tusing kenken beli, ane penting beli seger tur inget teken tiang, men kenken kabar beline miwah reramane jumah?” keto sautne Luh Ayu. Buin I Komang nyautin ”kabar ane aba beli mai luung miwah kekobetan, yen reraman beline jumah makedadua seger tur rahayu tan kirang pangan kinum” . ”Men apa kabar luungne tur apa kekobetanne, indayang raosan, nyen nawang tiang bisa ngemahang ngidih pepineh nang abedik”, keto buin raosne Luh Ayu. ”Beli katerima dadi calon pegawe kapal pesiar ”Charles-King”, sakewala kekobetanne beli kuangan pipis buin telung yuta rupiah, anggon ngenapang apanga ada duang dasa yuta rupiah”, keto sautne Komang Jayadi. ” Nah, nyen unduke ento eda sanget beli kenehanga, ne tiang ngelah bungkung, gelang miwah kalung, ne suba adep anggon ngentugin, apanga tulus pejalan beline megae di kapal pesiar”, keto sautne Luh Ayu. ” Suksma pesan beli teken pitulungan Luhe, dumogi buin pidan yan beli suba mebalik mulih uling kapal, ditu Luh lakar ajak beli nganten, jani melahang pagehang Luh ngaba raga, astitiang beli apang rahayu ngalih gegaen di kapal pesiare”. Timbalina teken Luh Ayu ” Eda buin beli sangsaya teken tresnan tiange, lakar pageh tiang ngaba raga, tresnan tiange wantah beli ane ngelahang, sakewala ingetang ngirimin tiang surat apang ada anggon tiang ngisinin atin tiange ane kasepian satmaka penyilur ragan beline”. Disubane Komang Jayadi ngadep sekancan mas-masan ane baanga teken tunanganne, dadi pas pesan ajine telung yuta rupiah, payu ia ngelunasin administrasi miwah ngurus paspor dadi calon pegawe kapal pesiar ”Charles-King”, ulian pitresnan tunanganne. Ento mawinan ia mejanji dikenehne lakar tetep tresna tur satia tekening Luh Ayu. ”Piwelas Luhe sanget suksmayang beli, dumogi Ida Sanghyang Widhi tetep ngicenin beli ajak luh kerahayuan apanga mresidayang iraga buin pidan nganten” keto munyinne Komang Jayadi, sahasa ngelut Luh Ayu baan keliwat tresna tur bagiane. ”Nah, beli komang, melah-melah beli megae ditu di kapale, eda pati mamunyah miwah meplalianan dogen ditu, apanga beli sayanganga teken bos beline ” keto pengwales raosne Luh Ayu.

            Di subane sanja, ditu lantas Komang Jayadi mewali nuju ke desa Pucaksari di bongkol bukit kutule, lakar nyiagayang seananing administrasi, paspor, surat-surat miwah jagi ngaturang bakti ring pura kayangan desa, mangdennya selamet rahayu pemargine, sawireh lakar ngarungin pasih makelone dasa bulan.

            Setonden Komang Jayadi luas, ditu bapane nuturin ia ” cening komang, melah-melahang ngaba raga tur selegang megae ditu dikapale, sawireh jani bapa ajak memene suba nyansan tua, nyansan tuna megae, buin besikne pis ane anggon cening ento mula pipis panes, patut cening jani ngalih peneduh apanga pis ane anggon cening ento apang dadi pis tis, ane presida ngupapira cening miwah reraman ceninge dini di mrecepada ”. Kewales baan I Komang Jayadi ” bapa, tiang nyuksamayang pesan teken pitresnan bapane, dumogi Ida Sanghyang Perama Wisesa ngicenin tiang pasuecan apanga lancar tur kasidan megae di kapale”. Buin sautina teken bapane ” Nah cening, mejalan apang melah, bapa ajak memen ceninge lakar ngerahina ngastitiang mangda cening ngemangguhang kerahayuan, buin abesikne kabarin bapa tiap bulane, ento kirimang surate teken tunangan ceninge Luh Ayu, apang ia nekedan keadaan ceninge ditu megae di kapale, ”. Pamuput I Komang Jayadi mepamit teken reraman ipune ngungsi pelabuhan kapale di Benoa, keanter olih mobil sewaan ane tragia ngangkut seananing babekelan ane keaba luas. Aketo ketuturan yowana Baline ane ngutamaang ngalih gegaen anggona bekel masa depanne miwah apang presida nulungin guru rupakannyane, satmaka pangwales piutang ring mrecapada..

Puput.