Nyentana
Ni Komang Sri, keto anake nyambat adan
anake bajang ene, kajegegan saja tusing ada ane ngidaang nyaihin di desane,
satmaka bungan desa yening upamayang. Pengadegne langsing lanjar, kulitne
kuning langsat, bokne selem lantang, yening saihang miribang mesaih ajak
bintang sinetrone ane suba kasub ” Agnes Monica”, keto truna-trunane ngorahang.
Ni Komang Sri mula anak bajang aget tur bagia manumadi ke mrecapada, sawireh
ngelah meme bapa ane sugih tur sayang tekenin ia. Ni Komang Sri sanget pesan
kesayangan teken reramane, karena ia ane lakar glantingine ajaka meme bapane,
apang nerusan keturunane apanga tusing putung, sawireh ia tusing ngelah nyama
muani.
”Cening
Komang, bapa ngidih tekenin cening, apang melah-melah ngaba raga, eda kanti
cening ngalahin bapa nganten, yening ngidaang apang cening ngaba anak truna
apang nyak nyentana dini, ngentosin ragan bapane dini mekrama di desa” keto
pabesen bapane ane setata kaingetan teken Komang Sri. Apang tusing cara
embok-embokne ane ngalahin meme bapane nganten tanpa pesadok, ”nganten
ngerorod” alias ”kawin lari” ajaka tunangane.
Ni Komang Sri suba mekelo megae di hotel bintang lima di Nusa Dua. Ia
maan tugas di bagian front office, cocok ajak kebisane miwah kejegegane. Ada suba limang tiban
mekelone ia megae di hotele ento.
Risedek ia maan libur, kebenengan masi ada odalan di Pura Kawitanne di desa
plekadanne. Ia mulih ajak tunanganne ane
bareng-bareng megae di hotel. Disubane teked di jumahne di desa, ditu ia ajak
tunanganne seleg nulungin reramane ngae sehananing bebantenan. Tunanganne ane
madan Mas Joko seleg nulungin bapane ngae lakar basa genep, ane anggone mebat
buin maninne. Mas Joko mula truna bagus alep tusing pati ngeraos liu. Ia di
hotel maan tugas di bagian room boy. Suba ada atiban ia metunangan ngajak Ni
Komang Sri.
”
Cening Komang, nyen anake muani ane ajak cening mai ? ” keto petakon memene.
”Ene suba tunangan tiange meme, ia madan Mas Joko uling Jakarta” keto pesaut
pianakne. ” Men nyak ia lakar nyentana dini ?” keto buin petakon memene. ” Ia
misadia nyentana, nganten ngajak tiang ” keto pesautne Ni Komang Sri. Mara keto
pesaut pianakne dadi lega pesan memene tur sahasa ngelut Ni Komang Sri, tusing
merasa yeh peninggalanne nerebes baan kaliwat bagiannyane. ”Nah ene mara pianak
meme, tusing pocol meme ajak bapa, serahina ngerastiti ring Bhatara Kawitan,
apang keluargane dini tusing kaputungan ” keto raos memene sambilanga
ngelanturang mejejahitan. Bapane Ni Komang Sri masi sanget liang bagia, sawireh
suba ada ane lakar glantingine di kayangne tua. Sakewala enu masi inget meme
bapane teken paundukan-paundukan sebet ane suba nibenin pianakne Ni Komang Sri ane
malu.
Ipidan
ia suba ngelah calon sentana, ane enu ada hubungan penyamaan, ane madan Gede
Cita, misane kapurusan teken Ni Komang Sri. Ajaka dadua suba pada tresna asih
lakar makurenan. Gede Cita mula truna bagus tur suba megae dadi kepala urusan
(Kaur) di desane. Meme bapane Gede Cita suba patuh paitunganne ajaka meme
bapane Ni Komang Sri lakar ngantenan manut cara dresta di desane.
Sakewala
suratan hidupe tusing dadi kelidin. Gede Cita ngalahin mati metabrakan risedek
ia ngandeng Ni Komang Sri ke salon kecantikan di mekire upacara pewiwahanne. I
Gede Cita mati ditongos metabrakanne, sakewala tunanganne Ni Komang Sri selamet
sawireh ia ketes ke carike ane sedeng misi padi. Ento makerana mekelo Ni Komang
Sri sebet atinne nganti ngemasin gelem abulan tur opname di rumah sakit ane
paling elite di kota Denpasar.
Di subane ia seger ditu katuturin olih
meme bapane apanga ia tusing sanget ngingetang tunanganne ane suba ngalahin.
”Nah cening Komang, eda ento sanget sebetanga sawireh peduman nasibe suba ada
ane ngitungan, iraga dini hidup di mrecapada patut kukuh mautsaha lan
ngerastiti bakti apang prasida manggihin kerahayuan” keto tutur bapane tekenin
Ni Komang Sri. Ni Komang Sri mula anak bajang ane setata setinut lan bakti
teken reramane. Ia ngidaang ngengsapang tunanganne ane suba ngalahin mati. Ia
tetep megae di hotel bintang lima di Nusa Dua. Yen ia merasa kangen teken
reramane ia mulih aminggu cepok. Dikenkene yening ia sibuk maan tugas double
sit, ia mulih abulan cepok. Pepesan ia ngoyong di tongos kosne di Nusa Dua.
Ni
Komang Sri jani suba masi ngelah tunangan ane madan I Nyoman Tantra. Tunanganne
ane nomer dua ene megae dadi Balawista di Kuta. Ia metemu ajak tunanganne
risedek Ni Komang Sri melali ke pesisi Kutane nyelimburang manah. I Nyoman
Tantra mula truna bagus, pengadegne tegeh, siteng, ganggas, sakewala kulitne
seleman buin abedik sawireh sai-sai kena ai di pesisi. Ajaka dadua suba saling
tresna asih lakar ngelanturang makurenan. I Nyoman Tantra suba nyak lakar
nyentana, sawireh ia suba ngelah
beli-beli ane lakar ngantinin reramane di desa pekraman pelekadanne.
Minabang Ni Komang Sri tusing mejatu karma
ajaka I Nyoman Tantra, sawireh satonden tulus lakar makurenan, tunanganne I
Nyoman Tantra ngemaluin nganten ajaka tunangane ane buin besikan ane madan Siti
Nurleha, pianak pengusaha gede uling Jawa. Siti Nurleha sedeng enu kuliah di
Fakultas Kedokteran. I Nyoman Tantra suba mekelo metunangan ngajak Siti
Nurleha. Ketemune risedek ia nulungin nyelametang Siti Nurleha nyilem di pasih
Kutane. Dugas ento Siti Nurleha sedenga libur semesteran. Iseng ia melali tur
ngelangi di pesisi pasih Kutane. Bapakne Siti Nurleha ane madan Pak Gatot ngalih
tur ngajak I Nyoman Tantra ke Jawa apang nyuang pianakne sawireh suba beling
duang bulan. Ditu di Jawa I Nyoman Tantra ajaka Siti Nurleha antenane cara adat
ane suba kelaksanayang ditu. I Nyoman Tantra terus ngoyong di Jawa sawireh ia
dadianga direktur salah satu perusahanne ane gelahanga teken matuanne.
” Uduh, Dewa Ratu Agung..!, dados
asapuniki lacur titiange manumadi setata katibenin kasungsutan ” keto sesai
penyambatne Ni Komang Sri sebet ngangen teken dewek tanpa guna, yening ia inget
teken paundukan larane ane malu. Aketo paundukan-paundukan imaluan ane nibenin
Ni Komang Sri satonden matunangan ngajak Mas Joko.
” Nah Komang, yening saja Mas Joko suba
nyak nyentana dini, nganten ajak ragan ceninge, bapa ajak memen ceninge lakar
nunas pewarah-warah miwah pematut ring Ida anake lingsir di Geria Manik Sari ”
keto ujar reramane risedek Mas Joko suba ada di jumahne tur lakar sanggup
nyentana, nganten nyuang pianakne.
Disubane igum paitunganne ajak pianakne
miwah para penyamaan dadyane, ditu lantas meme bapane tangkil ke geria nunas
pewarah-warah ring Ida anake lingsir. ”Yening saja Mas Joko nyak nyentana,
makurenan ajaka Ni Komang Sri, sepatutne ia meupakarain cara adat iragane ane
suba ketami miwah kepagehang olih para leluhure ” sapunika baos Ida anake lingsir
teken meme bapane Ni Komang Sri. ” jani Mas Joko satonden keantenan ajak Ni
Komang Sri, gaenan ia malu upacara manusa yadnya, uling upacara mara embas
nganti upacara menek bajang ” kenten malih bawosne Ida anake lingsir. ”Disubane
lakar ngelaksanayang upacara pawiwahan ditu masi gaenan upacara sudi wadani
apang buin pidan ngelah pretisentana ane suputra tur apanga rahayu kayang
kawekas ” sapunika panelas bawos Ida anake lingsir teken meme bapane Ni Komang
Sri.
Disubane
polih padewasan sane becik, raris Mas Joko ke upacarain manusa yadnya ngelantur
upacara pawiwahan miwah sudi wadani nganutin dresta sane kelaksanayang ring
desane irika. ”Dumogi Ida Hyang Perama Kawi ngicenin cening ajak dadua wara
nugraha apang bagia kayang kawekas” sapunika pewarah Ida anake lingsir
ritatkala upacara pawiwahan miwah sudi wadanine sampun puput. ”Mirib pejatu
karmane Ni Komang Sri tusing ajak truna Bali, ajak truna Jawa payu kesidan”
keto pakrimik krama desane risedek nyaksiang upacara pawiwahan miwah sudi
wadanine Ni Komang Sri.
Puput.
Kemoning –
Semarapura, Januari 2009
0 Komentar:
Posting Komentar
Berlangganan Posting Komentar [Atom]
<< Beranda